رواية غرام تركي الفصل الثالث 3 بقلم لؤلؤه محمد
غرام اكتفت بصدمتها إن ظابط مخابرات ومش أي ظابط ده هكر كمان وقررت إنها تعمله حظر وعملت حظر فعلاً وأكيد واحد زي ده مش هيشغل باله بيها ونامت وهي مطمنه إنه هينساها أكيد
تاني يوم صحيت غرام على كوباية ماية بتتحدف في وشها
ماما / قومي يا موكوسه يابنت الموكوسه هاتي طلبات الأكل عشان أبوكي الغالي جاي من الكويت انهاردة
غرام / ياما هو كل ما أبويا يجي من السفر تقعدي تمشوري اللي جابوني متسيبيني أفرح بجايته مره في حياتي بدل ما انتي مكرهاني في عيشتي كده
ماما وهي بتوطي تجيب الشبشب / شكلك مش هتقومي بالزوق
غرام وهي بتنط من مكانها / هقوم والله هقوم أنا قومت أصلاً
ماما / 5 دقايق وتكوني قدامي
غرام / تمام يافندم
قامت غرام غسلت وشها ولبست عباية وطرحه بسرعه وطلعت لمامتها / ها ياست الكل عاوزه ايه
ماما / هاتي نص كيلو لحمة مفرومه من عند عمك جمال الجزار متجيبيش مجمدة وهاتي كيلو مكرونة بشاميل وهاتي فرخة ٢ك
وهاتي ازازة حاجه ساقعه سمره أبوكي بيحبها وهاتي ب٥ج مخلل وكيسين شيبسي
غرام وهي متنحة / حاضر يا ماما
ماما / اوعي تنسي حاجه يا غرام
غرام وهي بتخرج وتشد باب الشقه وراها / عيب عليكي ده أنا غرام
نزلت غرام على السلم ولقت عيل واقف ضربته على قفاه / ازيك ياض ياحمؤه عامل ايه
حمادة / ازيك يا غرام منزلتيش ليه تلعبي معانا امبارح
غرام / كان عندي ماتش كده المهم هنلعب انهاردة بإذن الله عرف العيال كلها
حمادة وهو بيجري/ اشطااااا
غرام / اشطا عليك
جيت ماشية رجعت وقفت تاني / هو انا كنت راحه فين يالاهوي عليا وعلى سنيني اه صح كنت راحه أجيب طلبات لأمي كانت عاوزه ايه بقى كيلو لحمة مفرومة مجمدة ونص كيلو مكرونة عادية وفرخة ٣ك وزبادي ونشا ومخلل وحاجة ساقعة ميرندا برتقان الله عليا وعلى ذاكرتي اللي ماما هتحسدني عليها وراحت بسرعه تجيب الحاجه ورجعت البيت تاني جيت تفتح بالمفتاح والمفاجأة مش لاقيه المفتاح لطمت على وشها بحزن من حظها اللي وقعها مع مامتها اللي هتهزأها عشان المفتاح اللي ضاع للمرة الألف خبطت بخوف وقلق من رد فعل مامتها واللي فتح علي أخوها
علي / ايه يا روما اتأخرتي ليه ده كله
غرام بهمس / المفتاح ضاع
علي / دي ماما هتنفخك
خرجت مامتهم من المطبخ بسرعه جبتي الحاجه يا غرام وواقفه عندك بسرعه يابنتي خليني ألحق أعمل لباباكي لقمة ترم عضمه اوعي تكوني نسيتي حاجه يا غرام
غرام / عيب عليكي يا ماما جبتلك كل حاجه
خدت مامتها الكيس ودخلت المطبخ بسرعه
علي / طب وبعدين في المفتاح ده
غرام / هتطلعلي نسخه طبعاً من غير ما أمك تعرف
علي / يا غرام انتي مش هتفوقي لنفسك بقى يابنتي هو انتي وفجأة قاطعه صويت مامته اللي طلعت من المطبخ جري وهي ماسكه الشبشب وبتجري ورا غرام اللي جريت بسرعه بتلف حوالين السفره
غرام / اهدي بس يا حاجه مكنش مفتاح اللي يوقع بينا كده
ماما / مفتاح ؟ انتي كمان ضيعتي المفتاح يا ضايعه يا أم مخ هربان
غرام / عيب يا ماما كده خليكي أم حضاريه مش كده
ماما / ده هختم على وشك بالشبشب هعاملك معاملة الموظف الحكومي اللي بيختم بالختم يابت وهختم بالشبشب على قفاكي وتقوليلي عيب عليكي يا ماما عيب عليكي يا ماما والاقيكي مجبتيش ولا حاجه من اللي قولتلك عليها
غرام وهي بتخبط دماغها بإيدها / أخ أهو أنا قولتلكم ميت مره اكشفوا على ذاكرتي وانتوا اللي مش راضيين
ماما / ما انتي لو تفوقي لنفسك وتسيبي التليفون ده من ايدك هتتظبطي نفسي أعرف هتفتحي بيت ازاي يا معفنه
غرام / بالمفتاح يا ماما فجأة الشبشب لبس في وشها جريت بسرعه على أوضتها
ماما / أنزل يابني هاتلي الحاجه اللي أنا عاوزاها ربنا يهديها
غرام وهي بتفتح باب الأوضة وبتخرج راسها منه / يهديكي انتي لواحدك هيه وقفلت باب أوضتها تاني بسرعه
#بقلمي_لؤلؤه_محمد
#رواية_غرام_تركي الفصل الثالث
